Mendi Qyra shpall kandidaturën si i pavarur për kryetar të Strugës

 

Kryetari i Odës Ekonomike të Maqedonisë Veri-Perëndimore, Mendi Qyra, ka shpallur zyrtarisht kandidaturën e tij si i pavarur për kryetar të Komunës së Strugës. Lajmi është konfirmuar nga televizioni TV21.

Në fjalimin e mbajtur gjatë shpalljes së kandidaturës, Qyra tha se vendimi për të kandiduar nuk është marrë vetë, por është rezultat i kërkesave të shumta nga komuniteti lokal.

“Sot, zyrtarisht e shpall kandidaturën time si i pavarur për Kryetar të Komunës së Strugës. Nuk është një hap që e kam ndërmarrë kokë më vete, por është një vendim që më është kërkuar për çdo ditë – thirrje nga bizneset lokale që kërkojnë një orientim më të qartë të qytetit, thirrje nga të rinjtë që duan të qëndrojnë në vendlindje, dhe shtytje nga qytetarët e zakonshëm që nga unë kërkojnë guximin për të kandiduar dhe për të menaxhuar qytetin me përgjegjësi dhe përkushtim”, deklaroi ai.